公子C雖然攞唔到任何贊助，但見到張連偉有機會去打美國名人賽，實在係頭等大事，唔去親自見證，喺香港一定瞓唔着，於是把心一橫，一於自掏腰包，買機票，添置新相機，到AugustaNationalGolfClub去也。
名人賽今日（八號）正式開始，因為張連偉並不是世界前五十名球手，而係用每年賽會撥出嘅特別邀請名額過去參賽嘅，佢是否能夠在今明兩日makethecut，重未可知。據公子C臨走前話：「張連偉去年贏得亞洲大賽，故此美國對佢另眼相看，之不過參賽者位位都係巨星，世界頂尖高手，如果張連偉到咗第三日（十號），重可以繼續比賽，已經係值得大書特書嘅成就。」
張連偉識講日文（因做球僮時代，經常陪日本人打波），唔識英語，公子C去到美國，或者可以做張連偉嘅臨時繙譯，不過公子C乃係影相發燒友，最大心願就係在現場捕捉到啲大師嘅打波鏡頭，幫張連偉影番幾輯靚相，其他事情乃係次要。以公子C嘅教育水平、高爾夫球技術、影相功夫及經驗三方面加埋嚟講，全中國大概冇乜邊位仁兄仁姐好得過佢，左丁山自然希望佢一切順利，配合張連偉在美國表現得好好睇睇。
以左丁山之見，一個姚明令到NBA心花怒放，創造大量商機，如果張連偉在美國高爾夫球巡迴賽闖出名堂，做一個先行者，以中國之大，未來十年出番一個高爾夫球「姚明」，並非幻想，到時高爾夫嘅中國市場，你話會大成點呢！