由鄭中基（Ronald）主演的電影《我要做Model》日前拍攝宣傳片及海報，Ronald分別以姣婆look與迷人pinklady等造型出現，但厚厚的化妝卻令其眼睛發炎。
由谷德昭執導，鄭中基、林嘉欣、李燦森與陳子聰等主演的新片《我要做Model》，雖然正拍攝得如火如荼，但日前肥谷特地抽出兩天時間，為新片拍攝宣傳短片及海報。
鄭中基（Ronald）日前於柴灣影樓拍攝《我》片的宣傳短片及海報，雖然短片只得半分鐘，但Ronald、林嘉欣與李燦森等均以全新造型亮相。
其中Ronald的一身貼身喱士T恤、配上反光皮外套和大紅格仔長褲，這個「格格紫藤女look」令片場的工作人員捧腹大笑，Ronald說：「呢套衫係導演有份設計嘅，真係令我有啲嘔飯。點知埋位時導演仍嫌唔夠搶眼，重迫我戴埋紫色豹紋頭箍，真係姣到死。」
而Ronald於海報上的自摸貴婦look更是「媚態盡現」，但塗在Ronald眼上厚厚的眼蓋粉，卻令他眼睛發炎，他說：「工作人員問我係咪生眼挑針，真係慘。」拍攝完Ronald還要請假急急看醫生呢。
此外，Ronald戴上爆炸頭及披上銀色戰衣，騎在紫色的哈利電單車上，更讓他大呼過癮，Ronald說：「拍呢個shot真過癮，我肯定拍完呢部戲後，會有好多名設計師搵我行catwalk，到時又多一瓣數。」
