二十七歲嘅瀨戶朝香一直半紅不黑，我羅拉覺得佢輸在唔識自我製造話題。瀨戶唔會突然着到好誇張咁出現公開場合；又唔會放料俾人偷拍佢嘅私生活；喺記招上問佢同男友袴田吉彥係咪仍然好好，佢就即刻好乖女咁點晒頭，煙幕都唔識放吓。所以我羅拉覺得佢實在太乖女，咁樣點能夠喺藝能界殺出血路。
瀨戶極其量就係用正路嘅宣傳方法──出寫真集，務求谷吓人氣。瀨戶都意識到係時候賭最後一鋪，今次就一口氣打孖上，上個月先出本《STAZIONE》，下個月再出本《ASIAN》，前者喺意大利取景，賣嘅係高貴；而後者就充滿熱帶風情，喺柬埔寨街頭賣弄野性，兩個形象截然不同。
聽聞第一本嘅反應都唔錯，瀨戶長髮掩蓋裸胸嘅造型，都可以令人驚歎「佢都可以咁㗎喎」。但我羅拉就覺得佢表情十年如一日，難令fans產生遐想，希望佢下個月出嗰本，會把心一橫去得盡啲，先可以置諸死地而後生。