上個星期稅局公布咗全港最高薪打工仔排名，有人估除和黃大班霍建寧外，李超人兩個仔澤鉅同澤楷會榜上有名。事關電盈03年度年報顯示，有一名董事舊年酬金達四千五百萬至四千五百五十萬元，自然會覺得係小小超澤楷。
八方早前已講過，該位富貴董事唔係小小超，亦唔係副主席袁天凡，而係剛卸任副主席嘅張永霖，因為佢完成三年合約，獲得一筆可觀花紅（據傳三千萬元以上），故去年酬金達四千幾萬。有人同八方講，另一位去年賺一千七百萬年薪嘅電盈董事亦都唔係李澤楷，以電盈作風，相信係另一位去年離任董事班濤，酬金自然包括佢應得嘅花紅啦。小小超自合併後一直無攞電盈人工，去年只係收取二百幾萬實物收益，即係住屋津貼、水電、公司車輛等開支。
傳真︰2623-9278
電郵︰