新世界西半山柏道2號，創出一晚火速賣清佳績，緊接推出同區般咸道11號。
雖然都係單幢樓，由於喺正傳統豪宅區，買家要求較高。發展商話，今次同樣落足料炮製，採用有裝飾藝術之稱嘅ArtDeco為主調，造型講求瑰麗，圖案充滿現代氣息。
好似住客大堂，裝修豪華，樓底有成二十八呎高，掛上大型水晶吊燈，夠晒搶眼。單位唔多，得一百二十八伙，就一樣有成萬三呎會所，8月落成。
另外，發展商話，為照顧換樓客需要，聯絡十間銀行特設付款辦法，考慮提供比柏道2號更低定息優惠，希望兩三周後開賣。
代理行為求多做生意，通常猛搞各式比賽，送獎座、禮物、獎金，鼓勵前線營業員。中原卻搞新意思，轉為獎勵管理層，上月設「獨家代理大獎」，區域經理、營業董事與董事，若果攞到一手盤獨家代理權，可得獎座及三千蚊獎金。
結果現在揭曉，中原攞到佐敦金威廣場、荃灣寶雲滙、青山公路浪濤灣及元朗振聲花園獨家代理。淨係新界西董事王浩聰，個人包辦三個，九千蚊落袋。
一手樓價不斷創新高，二手造價也同步，利嘉閣分行經理姚偉基話，尖沙嘴擎天半島二手錄得創新高成交。
一座中層C，一八○五呎，由美籍華僑，用千四萬購入，呎價七七五六，齊創屋苑二手新高。單位冇連車位，所以呎價其實應該重高啲。
買家喺香港住咗七八年，做生意，睇咗兩三次就扑鎚，主要因為呢類單位好少放盤。
睇番中原網頁，擎天一手，造價最高二一二四萬，呎價最高八四七九蚊。一手都咁高，二手又低得去邊？
每逢假期，商場大業主例牌會搞活動，吸引人流，租客生意好，大業主都有着數。除咗搵人嚟商場表演兼送禮品外，有時都會同其他機構合辦活動。
希慎興業銅鑼灣利園二期商場，就同大來信用証（DinersClub）聯手送優惠。大來信用証持有人，喺商場消費滿指定金額，就有優惠。另外喺食肆消費又有折扣。
利園二期商場啱啱翻新完，大業主梗係要更積極做多啲宣傳推廣啦！
蘭西
電郵地址：
