城中名嘴鄭經翰嘅貿易公司被人淋油恐嚇，釀成國際事件，佢噚日清晨六點幾，獨自駕駛架積架返抵廣播道商業電台開咪，一路開車護送佢返工嘅三名港島總區重案組探員見大班安全抵埗，隨即離開，認真小心。
睇嚟今次真係唔係茶杯裏的風波咁小事，大班趁清明假期休假外遊，順便好好考慮是否會從此「封咪」，但仍未有決定：「我擔心家人嘅感受大於一切，太太（前港姐冠軍勞錦嫦）叫過我唔好再做節目，今次加速我要做引退嘅決定。」
對於記者觸及佢經常掛喺口邊嘅「監察社會嘅使命感」時，佢坦然帶少少潮州音咁話：「奸賊社會嘅使命感，冇啦！夠啦！回饋社會？普渡眾生？要做已經做晒啦！做咗時事評論工作十年，係一段長時間，自問工作上問心無愧，已經盡咗力啦！」
講到假若真係「封咪」，日後有何發展大計時，佢笑笑口話：「享下清福，做個平民百姓囉！」
（圖）鄭大班話重未決定係唔係「封咪」。
傳真︰2623-9278
電郵︰