美國著名饒舌歌手Eminem同埋佢隊組合D12，為咗宣傳最新大碟《D12World》，今晚將會同工作人員一行三十幾人到倫敦表演，不過由於佢哋要求多多，好多間頂級酒店都耍手擰頭，唔敢招待呢班麻煩友！其實Eminem同D12一向都好鍾意搞出位動作，你睇佢哋新MV《MyBand》就知啦！
今次MV集中講Eminem同D12平時嘅瘋狂行為，佢哋唔單止搵大班巨胸裸女做陪襯，重有一幕叫妓女上酒店開房同埋睇脫衣舞嘅片段，就算Eminem作歌玩音樂，都要搵個裸女陪彈琴，計我羅拉話，佢哋嘅荒唐事喺𠵱個MV入面完全反映晒出嚟！
講番Eminem同D12今次倫敦之行，據英國報章《DailyStar》報道，佢哋早前原來曾經聯絡各大酒店，要求包起成層樓，重要每間房都裝有頂級音響器材，同埋將所有窗門貼上黑布及騰空一部升降機畀佢哋用！𠵱家間間酒店聽到佢哋個名都怕怕，睇嚟Eminem同埋D12嘅隊友可能要瞓街囉。