個個分析員都估創科實業（669）全年業績靚到暈，結果盈利真係勝預期，有成6.74億元，比舊年勁升63%，兼夾有股息17.75仙派發。
雖然係咁，創科噚日仍然倒跌3.7%，收25.75元，擺明係一眾炒家借好消息出貨。事件教訓大家，如果炒業績嘅話，最好就喺公布業績前出貨。
另外，早前發出盈利預警，主席又減持嘅美聯物業（1200），近排再有人唱好，認為公司前景好掂。又再一次引證「此一時不同彼一時」，買股票要向前看嘅理念。
經紀黃話，其實事件唔難明，美聯股價先排勁升，股價一度炒上3.275元高位，主要係基金睇好本地物業市場，追捧佢哋之故。點知地產商一個唔該，話減新樓代理佣金，美聯主席身體力行減持股份，結果芬佬亦紛紛減持，據講有個星洲芬佬，直情係輸錢走人。
不過，市場上經常出現人棄我取，據講有人一直在低位收集美聯。近排有分析員睇得地產市場前景相當好，足以抵銷減一手樓佣金條數，結論係美聯將會好掂。
慕容小初