趙學而喺《皆大歡喜》中扮演巴辣妹「林玉露」，現實中嘅佢都不遑多讓，雖然趙學而做咗呢行咁耐，上個禮拜三又啱啱過咗三十三歲牛一，估唔到佢踏入中年，都一樣咁好火！
前晚十點，趙學而同一男一女朋友喺時代廣場後面嘅上落客區出現，當時佢戴住一個拉低咗嘅口罩，右手揸住支煙，當記者舉機影相時，佢即刻擰歪面咳咗幾聲，跟住就同記者講：「我咳緊，你唔好影得唔得呀？」記者問佢係咪唔舒服？趙學而就將把聲提高八度話：「梗係啦！你睇到啦！」
之後趙學而就左閃右避，重用佢揹住嘅大袋嚟遮住支煙，又以高key聲線同記者講：「我唔使答你嘢㗎喎，我𠵱家好介意你影相呀！」話口未完，趙學而就黑晒面咁撇低兩位朋友，自己行咗去對面嘅行人路，實行同佢嘅朋友向左走向右走，不過佢都算係一個盡責市民，食完煙都有將個煙頭丟入垃圾桶。
做藝人就預咗喺公眾地方俾人影相，食得鹹魚抵得渴，趙學而咁介意俾人影相嘅話，咁佢就真係要諗下自己啱唔啱做呢行。
吳孟達同馬來西亞籍太太侯珊燕結婚多年，生咗兩個細路仔，佢日前接受新加坡傳媒訪問時話：「我囡囡𠵱家喺新加坡讀書，重讀緊二年級㖭，其實佢讀書都好大壓力，每朝六點鐘就要喺新山坐車去新加坡返學，不過佢好乖，我哋兩父女感情好好。」
陳鍵鋒噚晚出席新片《孖咇勇探》首映，對於黃宗澤被女友Heidi力數佢一腳踏兩船，陳鍵鋒話：「我冇打電話畀佢，我怕騷擾到佢，只係傳咗短訊黃宗澤。」問陳鍵鋒無綫有冇唔准佢哋呢班新人拍拖？陳鍵鋒話：「冇，自己咁大個人，拍拖都唔出奇，𠵱家做好工作先。」陳鍵鋒又話同黃宗澤聚會時冇見過Heidi。
薛家燕噚日獲邀請去紅磡一金舖訂做價值八萬元嘅金肖像，作為金舖送畀家燕姐嘅母親節禮物，問家燕姐母親節點過，佢話嗰段時間忙登台，同仔女都只能食消夜慶祝。有記者問佢係咪近日買咗豪宅？家燕姐就微笑咁默認，不過就重未畀晒錢喎。
華裔小姐冠軍鍾嘉欣噚日同媽咪一齊入咗去將軍澳電視廣播城，嘉欣話佢媽咪今個月尾就會走，所以到時佢會同馬來西亞小姐一齊住。初初搬返香港，嘉欣唔係幾慣，佢話：「溫哥華住house，𠵱家香港住apartment，嗰間房就好似我溫哥華個廁所咁細。香港乜都唔識，好彩無綫幫我安排所有嘢。」
台灣歌手蕭亞軒早前應時裝雜誌邀請，去咗法國巴黎睇名牌Chanel時裝騷，佢見到當地有好多靚衫，當然唔肯錯過機會瘋狂購物，結果蕭亞軒就將身上嘅兩張信用卡都碌爆咗。佢獲大會安排喺有利位置睇騷，見到台上女模行天橋，蕭亞軒好留心咁睇，重猛咁讚佢哋好靚女㖭。
