於昨日（4月7日）正式揭幕嘅美國紐約國際車展，各家車廠都展出咗旗下最新款汽車，而其中最惹人注目嘅車款，實非可落場嘅福特MustangGT-RConcept莫屬。
記者：鄭達基
全新福特MustangGT-RConcept所採用嘅一台5.0公升V8引擎，絕對稱得上係強而有勁，事關呢台引擎能輸出高達440ps/7000rpm嘅馬力，而高達55.3kgm嘅扭力峯值，則於引擎處於5500rpm時發出，匹配一套由FordRacing專為其度身訂做嘅6前速波箱，起步加速反應凌厲有勁，性能表現毋庸置疑。
與此同時，廠方除為其安排有四輪20吋嘅高性能輪胎作組合，務求令路面循迹性有不俗表現外，四輪更有BremboRacing制動卡鉗作輔助嘅高效能透氣煞車碟，收放自如。
至於造型就更加吸引，不但沿用全新Mustang嘅身軀外，廠方更為其加入巨型GT-R字樣的四輪20吋跑車合金胎軨，加埋巨型尾定翼配搭，一派高性能跑車韻味油然而生；車廂鋪排亦甚具跑味，除備有承托力甚豐嘅高級跑車桶椅外，更有齊跑車軚環及腳踏等配備㗎！