有冇試過親戚來訪時彈出一句：「哎呀，我屋企都係用呢個鐘㗎。」相信那份無奈，對執着生活品味的人來說，應與章小蕙在Ball場同人撞衫無異。其實一個設計出色的掛牆鐘未必一定要你大破慳囊，無論閣下是否有間百萬豪裝大屋，或只是家徒四壁，都有理由令自己的時間更精采吧！
記者：張銘恩
攝影：蔡鴻雯
模特兒：Wing（RichStrategy）
有大師級作品亦有以科技設計出發，總之就是充滿時代感的品味之作，其中投射鐘款幾有Gimmick，終於跳出了掛牆鐘要掛起的傳統定律！
投射鐘夠Gimmick
一屋Plasma加B&OHi-Fi重有埋聲控垃极桶，唔擁有埋如此高科技的投射鐘又怎對得住自己？英國設計Timebeam投射鐘，可有限度調校焦距，備羅馬及阿拉伯數字兩款，相當架勢。
大師級作品
美國著名設計師GeorgeNelson的〝BlueBlockClock〞，由粉藍色配合白色的木頭組件而成，線條感重兼清脆利落。
不銹鋼齒輪
專玩不銹鋼的Kikkerland，其GearClock十分出名，這款GearClock金屬味重，齒輪會隨着時間轉動。
金屬凸字
看似無甚特別，但其凸字設計卻值得欣賞，因為暗地打破了框架，平凡中求不平凡。
玻璃方塊
四方形玻璃時計，顏色鮮豔而且夠晒Young，啱晒年輕人口味，不過論盡的朋友們最好諗清楚。
橢圓形砧板
設計唔花巧但盡顯心思，清簡易襯，不過，其優點亦係最大缺點，就係無外蓋之型酷設計缺少保護兼較易鋪塵。
彩珠太陽花
慨歎GeorgeNelson之作價值不菲的同時，好消息是日本仔已將他的〝MulticoloredBallClock〞平價再造，外貌相似度足有八成，如此價錢確令人滿足。
太空電字款
聽過有人話，好希望全屋家具都係圓形的，有咗個波波電視，又有張唔捨得坐的BallChair，不妨買埋呢個咁有SpaceAge味的LED跳字鐘。
想買個牆鐘襯你間花碌碌部屋？以下亦有多款選擇，最大特色係非傳統圓形外殼，話咁易就隱身成為家裏的裝飾品。
倒吊烏蠅拍
創意贏晒！由硬紙皮及金屬片做成的烏蠅拍，大小與真實烏蠅拍無異，好啱放喺房間做埋裝飾。秒針頭有隻烏蠅做出團團轉效果，好盞鬼！
音樂世家
唔知點解總要用高音譜號代表音樂，不過睇真點，這個九曲十三彎的外形確比耳仔勾形的低音符號優美得多。同款另有粉紅色選擇。
搞鬼汽水蓋
一屋顏色搶眼布置兼儲滿卡通公仔的話，呢款汽水樽蓋應該好啱襯，而且平平哋好抵玩，另外還有其他花款。
保齡球樽
雖然攞上手感覺比較輕身似玩具，但單憑咁得意的造型，已經足以令所有保齡球迷立刻乖乖畀錢即場擁有。
立體大蘋果
肥大肉厚的紅蘋果，最襯掛滿裝飾的女生Cutie部屋，最喜歡那些有點超現實的數字款，單是用來做擺設都一流。
木馬仔Rody
原身為歐美BB名牌Rody，由精於包裝的日本設計師們一手再做，搖身一變成為港、日女生寵兒，備有多色選擇。
Retro不論在時裝、髮型甚至家居設計方面，都為現今一大潮流主線，今次找來幾款懷舊時計，喜愛原創或是舊款新造，悉隨尊便。
古董倒三角
產自60年代的Romantic掛牆時計，橙紅色木框外殼配銀色金屬鐘面已經殺晒，重有星期日曆顯示加埋如此懷舊的字款，殺晒。
經典幾何圖案
啡×橙×米白都算60年代經典頭號配色，再加上幾何圖案可謂無敵襯法，想慳慳地呈現60年代味道，必選。
簡約數字款
英國Habitat舊款新造掛牆鐘，金屬外殼襟用襟擺，而且襯懷舊或摩登家居都OK，百搭之選。
塑膠60's圖案款
這款圖案懷舊掛牆鐘雖然係用塑膠製造，但唔使一嚿水就可以營造一個有Feel懷舊私竇，你重想點？
正宗懷舊
要原汁原味，這個產自60年代的打點報時魚尾鐘正合胃口，需每十五日上鏈一次，逢踏正踏半會有響聲報時，生產商〝555〞已經絕迹世間，千載難逢。
小型鐘擺
要扮舊的鐘擺款一樣有，例如這個仿金屬塑膠貨，Size細細都幾有趣的骰。
售賣點:
(A)Homeless(27821881)
(B)VMIConcepts(23321326)
(C)NICHE(23326256)
(D)C.I.Y.(31889901)
(E)亨得利(23889125)