以煲呔為首嘅政制三人組呢幾日忙餐死，因為周二人大常委一釋法，當夜即宣布要請北京三人組嚟香港特區解畫，八方聽聞，煲呔、詩姐姐同埋林D9嘅辦公室前晚差不多要打鑼搵人去聽訓，好似學者王家英，噚日返工先收到邀請，因為要上堂備課，所以都冇法去到，係搵食重要，定係愛國行先，王教授咁唔畀面，國家一定會記住。
今次係特區政府同中聯辦首次聯手搞座談，所以大為緊張，連老董幾時上大人都未知道。八方聽聞，喬曉陽、李飛同埋徐澤三人由中聯辦招呼，入住喺香港金鐘一間五星級酒店，費用當然由香港納稅人支付，噚晚由詩姐姐做東請客。三人組今日好忙，一早會去禮賓府見法律界，下晝去九龍灣見六十位立法會議員及各界人士。
喬曉陽噚日喺座談會談笑風生，梗係啦，主導權已收回，跟住就要做足公關，希望減少港人嘅不滿情緒，話晒中國都係打茅波奪權，好似姑爺仔咁，一夜風流，都要落吓嘴頭，咁個女仔先至肯乖乖跳火坑㗎嘛。
傳真︰2623-9278
電郵︰