港股噚日難得大反彈，在中資電訊股帶動下，恒指一度升近13000，收報12886，升155點，成交高達174億元。市場傳出資金回流，至於錢從哪裏來，有陰謀論者話，人大釋法令港人唔太高興，故要托高港股，令港人專注炒股，唔得閒搞其他嘢。
國內資金是否真的流入港股，阿虎都唔太清楚，不過國內似乎正在向香港輸出通脹，令財爺對通縮快將消失的願望好快成真，好似五豐行咁，已於上周將豬肉批發價調高8%，高過打工仔平均加薪幅度，如此回復通脹，唔脹好過脹。
最近被借殼上市的公司，大部份都係大幅mark高後不斷下挫，縱使大市噚日大幅反彈，亞洲物流（862）仍大跌20%，收報3.6仙；東方燃氣（432）再跌9.3%至0.39元；前稱中聯系統嘅和記環電（757）略為企穩，收報0.54元，升1.9%。獲注入15億元洗衣機及手機業務成為海爾集團白色家電旗艦嘅海爾中建（1169），噚日復牌挫6%至0.395元。黑客話，經過東燃與和記環電之役，散戶已經學精咗，但凡見到殼股以超低價發新股買資產，都不敢貿然追入，免得大股東減持時將股價震散。
永隆銀行（096）突然停牌，市場傳聞多多，有傳聞話星展想提全購，又有傳聞話想搞分拆，亦有人話佢上次俾花旗客彈佢派息孤寒，故追加派息，令花旗客開心吓。但坊間則當係好消息炒，追入同類規模嘅本地銀行股，中信國際金融（183）同永亨（302）炒高逾4%。
阿虎