電盈顏金施，為咗宣傳薄扶林貝沙灣三期，近排頻頻出席記者會，宣傳鋪天蓋地，樓盤定價及開售細節卻未有定案。
不過，佢近兩次出席記者會，都有備而戰，攜同價值連城嘅歐洲古董與名畫，一齊出席，落力推銷，唔知嘅，重以為佢轉咗行，做古董推銷㖭。
好似前日香港置業遊船河記者會，顏金施就帶埋「愛神」銅像，佢上次歐遊時，向一名收藏家買番嚟，價值五位數字美金。
噚日出席中原山頂開舖，佢又帶住幅名畫出席，出自十九世紀比利時畫家手筆，喺倫敦蘇富比拍番嚟，價錢比銅像重貴，盛惠五位數字英鎊。貝沙灣買家，日後可以用積分換番屋企。
顏金施日日帶住咁貴重嘅古董出席記者會，喺標榜個盤點豪之餘，無非用嚟轉移記者視線，唔好淨係掛住問售價、銷售安排，呢一類佢暫時畀唔到答案嘅問題。同時，記者又有得交差，認真識做。
潮流興講第三代流動電話，即係3G，長實賣樓亦都引進呢種新科技，配合長沙灣宇晴軒二期即將開售，夥同屬下推銷賣樓嘅置業精英，用視像手機帶客睇樓。
喺尖沙嘴港景峯商場嘅示範單位同售樓處，復活節後開放，到時想睇樓，但又唔想大排長龍，可以透過置業精英嘅視像手機，遙距睇樓；睇樓之餘，又可以對和黃3G手機認識多啲，順道為集團3G做宣傳，認真高招。
長實投資三十萬喺視像睇樓服務，包括提供一百部視像手機畀銷售員，及開設置業中心，由三間增至十五間。人手由一百增至三百。另外，置業服務中心會安裝Vfone組合，買家可隨時視像通訊，越洋睇樓。繼佐敦站置業中心噚日開幕後，又會喺荔枝角、旺角站搞路演。
復活節未到，商場大業主已經籌備迎接內地五一黃金周。
新地與恒基嘅中環國際金融中心商場，向內地客招手，期間去商場嘅內地客，只要出示中國旅遊證件，就可免費攞到旅行禮品包，有場內名店送出嘅優惠券。
既然想內地客消費，梗係要搞噱頭啦，只要買滿八百蚊，就可以抽獎，永不落空㖭，獎品有澳洲紅酒及化妝品等，之後重可以去報名，上國金二期七十一樓，睇吓維港美景，順便影番輯靚相，返屋企威吓。大業主果然識盡用自己物業嘅優勢。
內地自由行限制，好快進一步放寬，大量內地客嚟港旅行、購物消費。本港商戶，好多都肯收人民幣，不過擔心收到偽鈔，信和就為多個商場商戶，提供「人民幣鑒別課程」。
呢個課程，由中國銀行專家主講，內容包括介紹人民幣現時流通嘅款式，同防偽特徵，等啲前線營業員可以識別，咁就唔驚收到偽鈔啦！
營業員重分分鐘可以同內地客講得兩嘴，令到氣氛更融洽。
同時，又會介紹銀聯上卡使用守則，同申請接納銀聯卡手續，方便持卡內地消費者。
豪宅市旺，唔少代理行，都有意進攻呢個市場。
啱啱喺旺角開完商舖部旗艦店嘅美聯，計劃喺西半山羅便臣道，增設住宅部旗艦店，提供特別服務，招呼班半山大豪客。
噚日現身商舖部慶功宴，美聯執行董事張錦成話，公司準備喺羅便臣道開嘅住宅部旗艦店，佔兩層，四千方呎，好快會開張，不過，張董拒絕透露詳情，只係話，間舖會提供較一般舖位多嘅服務，好似貴賓會議室，佢又講笑咁話，連畀小朋友玩嘅兒童天地、代客泊車服務……都有提供。
蘭西
電郵地址：
