Kiny與Boby兩姊弟情比金堅，復活節想結伴郊遊，又嫌行山只得一日未夠喉，9歲Mark哥有好介紹，一家大細玩兩日一夜露營初體驗。先到海下灣看紅樹林，敲敲東風響石，再漫步到營地紮營煮飯玩遊戲。翌日領隊還教大家使用指南針及地圖，幾個家庭比賽野外定向，啱晒自問合拍到暈的兩姊弟。
記者：陳慧敏
攝影：林栢鈞
模特兒：Kiny、Boby（RichStrategy）
鳴謝：旅行家
下車往營地，從迴旋處下小路到海下灣，只得十數塊石的石澗已是本程最「艱險」一段。沿路密林滿布，樹根盤纏，只容得點點陽光透進來，感覺舒服又神秘。
沿着行山人士開鑿出來的石梯級來到淺灘，視線突然開闊。淺灘如鏡，一邊紅樹林叢生，遠處見有數隻白鷺。大人們靜賞靚景；背後只聽到Mark哥與Kyle在大喊：「呢度好多呀！跳吓跳吓咁！」，原來泥灘上有很多蟹仔在搵食，又有彈塗魚在跳動。
沿路走到隔鄰灘岸再回大灘樹木研習徑，可順遊東風響石及百年灰窰。爬上響石需一番工夫，Kiny與細佬Boby一到達就用手猛敲，「冇聲嘅？」旁邊Mark哥遞來一小塊石頭：「用呢個呀！」小石擊下，響聲果然清脆。研習徑上的灰窰已有百年歷史，村民用鐵鉗長竹從海底鉗出珊瑚，混合貝殼一起連燒數天，出產的石灰可用於農業及建築。不過二次大戰後，英泥出現，易碎的石灰無人問津，灰窰也就正式退休。
到達灣仔西營地，玩到一身汗，是時候紮營唞唞。導師在旁細心指導，「𠵱……」Mark哥出盡力，營釘依然插唔入，「個地好硬呀！」賴地硬？原來是營地有石頭，換個位置，合五人之力，張起營幕，終於搭起一個五星級的家！
體力勞動完後，餓了！是時候煮食了。架起爐火燒水，洗菜的洗菜、切餸的切餸，所用的只有簡單餐具。小朋友對這種獨特的「煮飯仔」最感興趣，三個人搶住洗菜，跑出跑入攞水，大家煮得投入。
營「火」危險，晚上搞個營「燈」晚會一樣有氣氛。營內，Kiny跟Boby講講兒時趣事已經忘了時間，忘了隔天還有個關乎家族聲譽的比賽正等着他們──定向追蹤。
拿着那張不知向左向右的地圖，還未瞓醒嘅Kiny皺眉。還好Boby醒目，指南針絕對難不倒他。加上灣仔自然教育徑只得2公里，路面又平坦，只要行快兩步，絕不會輸給慣看地圖的Mark哥。槍聲一響，Boby拖住Kiny跑呀跑，超前幾十班，每到一個CheckPoint就釘印。果然遙遙領先直奔終點。領隊望過兩人「打卡紀錄」，面有難色：「小姐，你啲印打埋同一個位，認唔到，計唔到數喎！」雖然姊弟同心，但都要熟習野外定向的規矩先得㗎！
野外露營初體驗
適合年齡：歡迎8歲以上家庭成員參加
日期：4月9日至10日、5月15至16日
截止報名日期：4月8日、5月7日
（對應上述2個日期）
價錢：每位$450；若4名參加者一同報名，一人免費。
查詢：28365878
網址：
交通
海路：逢星期六、日及公眾假期，可乘渡輪往來西貢黃石碼頭至南風灣，普通渡輪$15，冷氣渡輪$18。
陸路：7號綠色小巴$10往來西貢碼頭至海下村。