投資者見過鬼怕黑。噚日海爾中建（1169）復牌，股價又係先升後回，一開就見0.48元，掂一掂0.495元就開始急回，收市倒跌6%，收0.395元，注資故事似乎近期唔再受歡迎。
愛冒險嘅經紀陳又向小初推介高風險股，就係在1月時配過股嘅通達集團（698），雖然家陣隻股PE睇落相當高，但在今個月19日公布全年業績後，屆時應該唔會再失禮。
早在通達1月份配股時，經紀陳已經話過貨源落入強者手，起初小初都唔太相信，但睇真啲，原來大摩同埋一間德資行，加埋揸咗14％股份，確係令小初有多少意外。
因乜原因通達會咁受芬佬歡迎？小初唔清楚。不過，股價同樣睇落唔平嘅中意控股（1198），早排一樣被美資行大力唱好，由於證券界係一向跟紅頂白，既然有大隻佬話得，小初唔敢話唔得。
通達噚日升5.9%，收0.27元，雖然成交只得613萬元，但見外資行密密掛牌買入，真係嚇得吓人。
慕容小初