繼退隱多時嘅廁所博士前市政局主席梁定邦之後，香港政壇又出現一位廁所專員，今次呢位專員比梁定邦更專，專攻女廁，不過唔好以為佢係女人。八方講緊嘅係立法會議員羅致光，光哥最近不厭其煩，一再去信民政事務局，要求當局起多啲公眾女廁，方便香港婦女。
因乜事光哥咁有興趣解決女性嘅急事？原來佢放假經常陪囡囡出街，而囡囡出街時少不免間唔中要去方便一下，其間光哥察覺到囡囡浪費唔少青春去廁所，而佢自己亦因此而浪費咗好多光陰等囡囡，問題癥結就係香港公眾場所實在太少女廁。為咗促進社會效率、促進父女感情，羅致光搜羅晒世界各地男女廁比例，大力推動香港成為男女廁平等之都。
傳真︰2623-9278
電郵︰