人大釋法，中國政府採取「砂屎政策」，一啖砂糖一啖屎，最終喺砂屎兩極，中間落墨，首先係確認基本法附件一第七條「二○○七年以後各任行政長官產生方式如需修改」嘅「二○○七年以後」，係計埋二○○七年，亦即承認民主派及司法界所講嘅常識，摑咗親中土共一度指鹿為馬話「二○○七年以後亦即不包括二○○七年」嘅超級愚民反智謬論一巴。
不過，中方將附件一所講：二○○七如有普選；由「立法會三分之二議員通過，特首同意，報請人大常委會批准」嘅123程序，加多咗一項：如果想改變玩法，由特首先向中國提交報告，再由中國人大常委審核，有冇「需要」，有冇違反「循序漸進原則」，批准報告之後，再由特區政府起草議案，交立法會表決。
本來，要立法會三分之二議員通過嘅普選議案，冇可能由議員以私人草案形式，一定要由特區政府啟動提交立法會。現時，中方就照准特區政府「啟動」，不過「啟動」之後，要由中方搶先審批，至准掟去立法會，費事以後至打死狗講價，咁即是「123程序」喺1同2之間，僭建多一步，叫做1a，亦即條程式，由123變咗做「1（1a）23」嘞。
咁即是話好似一座建築物，一二樓之間，起多座簷篷，隔咗一隔，樓上三樓掟咗啲死貓，吐咗篤痰落嚟，有簷篷隔住，唔會滴落樓下。喺環境清潔嘅歐美國家，加多層簷篷，梗係多餘，不過，喺污糟邋遢，人人冇公德心嘅中港華人社會，中方話要多件簷篷過一過濾，有冇違反建築條例？佢有把槍插喺腰，佢話冇，你都吹唔脹。微妙處在於：由特首提交報告，亦即由中國政府重新大樹特樹阿董嘅統治權威。將個啟動權，正式交畀阿董。
前一日，親中反港分子鄔維庸，代表特區土共反董大聯盟，喺北京公然狂插阿董背脊，話「中央認為董建華缺乏威信」，企圖奪走阿董本應享有嘅修改○七特首選舉方式嘅啟動權，將阿董架空、挖空、食空，想引誘中央人民政府直接啟動釋法，亦即挑撥離間，不過，現時嘅中國政府，有啲領導人十分精明，亦有少少開明，睇穿咗鄔維庸之流嘅親中反董分子挑撥離間嘅毒計，今次唔領嘢，將個吹雞開波權，交畀阿董。問題就係，阿董個報告點寫，又要依據「曾麟詩政制專責三人小組」徵詢民意嘅結果。咁若果三人小組想靠害阿董呢，只要全部徵詢番鄔曾土共同維園阿伯，咁阿董就要揹上歷史性嘅大黑鑊嘞。
但係三人組會唔會徵詢真正民意呢？又要睇佢哋會唔會仰測本地土共老左嘅角色，會否將鄔維庸等人嘅體味，當咗做中央阿媽嘅嗰陣溫馨嘅母乳氣息呢？所以鄔維庸、曾憲梓及其他老左，重有好多權力空間，繼續玩殘靠害阿董喎！今次，可能就係阿董向歷史交卷嘅最後機會嘞。
傳真︰2623-9278
電郵︰