復活節前，港股由外圍股市上升帶動，恒指再升155點。政治因素，股民唔理。
恒指收12886，上到萬三點睇嚟冇乜問題。炒恒指Call輪，可以揀啲長期輪，例如9788同9799。9788今年9月到期，輪價22.3仙，溢價3.1%，槓桿率10倍，引伸波幅27.3%。9799亦係9月夠鐘，輪價22.2仙，溢價2.3%，槓桿率9.4倍，引伸波幅26.3%，呢件數據靚過9788啲，但交投活躍則不如9788。
招商局（144）收11.45元，升3.2%，逼近1月高位11.75元。招商局Call輪9264，8月到期，輪價20仙，溢價0.4%，槓桿率5.7倍，數據好靚，但要考慮正股再升水位可能有限。
有石化成份嘅股份生猛，燕化（325）彈升7.4%。中石化（386）升得5仙，估計會跟住上埋去，昅住相關Call輪。9409年底到期，呢隻係平均結算輪，可睇正股個勢短炒。而9909亦有可取之處，就係負溢價3.5%，缺點係槓桿率3.4倍唔得爆炸，且成交太靜，隻輪7月初到期，昨收91仙，屬「大價輪」，唔啱想刀仔鋸大樹炒家。中石化如果郁，中石油（857）亦唔會冇份，可留意中石油Call輪9343，隻輪12月到期，壽命夠長，輪價80仙，溢價0.8%，槓桿率4.9倍。
章盛