喺做決定前真係要諗清諗楚，唔係盞自己後悔；好似喺下屆由雲達不來梅加薪過檔史浩克04嘅艾列頓咁，佢就喺簽約後，嫌間新球會呢樣唔好、嗰樣唔好。
喺今屆德甲聯弗到爆（二十七場入二十五球）嘅艾列頓，喺禮拜一接受一間德國電台訪問時話，史浩克04位處嘅地方蓋爾森基興，簡直唔係人住。佢竟然咁話：「嗰度唔淨只唔靚，重衰到冇朝氣兼冇娛樂，點啱啲後生仔住呀？雖然我將會效力史浩克04，但就可能繼續住喺不來梅。蓋爾森基興只係我工作嘅地方。」
艾列頓喺德國大大話話住咗成六年，就算對蓋爾森基興認識唔多，起碼都識少少；𠵱家佢先至嚟怨，我求大俠就覺得事有蹊蹺。咪話我求大俠諗衰佢，九成係佢見自己紅咗，想踢間大啲球會同踢歐冠盃，於是就出激將法，等史浩克04同佢解約囉！
灰熊喺噚日作客爵士時，收起咗兩名主力加素同威爾斯，搞到卒之以十一分大敗。其實灰熊已經穩佔西岸第五位入硬季後賽，但又好難追上第四位嘅馬刺，所以今場波輸贏影響唔大；反而爭緊入季後賽嘅爵士就要非勝不可，所以波友呢排揀波時一定要留意埋季後賽因素啦。
達拉斯小馬班主古賓出晒名多鬼主意，最近佢又同電視台合作，搞咗嗰類似《生還者》嘅節目，叫做TheBenefactor，首日已經有五百人報名。古賓唔單止自掏腰包攞咗一百萬美金出嚟做獎金，自己重玩埋一份考驗班參賽者，親自挑選出呢個可以贏得佢歡心嘅幸運兒。
米禾爾打入足總盃決賽兼穩得來季足協盃資格，每位球員將獲約七十萬港元獎金，對於佢哋好多球員嚟講已經好豐足；不過球員兼領隊韋斯就頭痛嘞，事關佢到𠵱家都重未有歐洲足協認可嘅教練牌，除非佢趕得切考到牌啦；如果唔係，搵定佢副手、名氣重響嘅韋健士教都得嘞！
列斯為咗籌旗，預售嚟緊二十年季票，但反應奇差；佢哋高層減價促銷，冇好似蘇超格拉斯哥流浪咁迫球迷買飛。流浪要球迷喺五月三日前買下屆波飛，但球迷唔知會方下屆有乜目標同大唔大搞，驚隨時貨不對辦。消委會成日話，買嘢前要驗清楚件貨，家陣流浪貨辦都冇，又點買呀？