馮仁昭四圍超：
李連杰單挑《英雄》張藝謀火滾

李連杰為某牌子飲品拍廣告，前日去咗北京出席記者會，杰仔話同利智有咗兩個女後，如果有一日佢決定唔打，佢會開發遊戲公司，等小朋友可以玩一啲對身心有益嘅遊戲。

不再與Miramix合作
另外，由杰仔、張曼玉、章子怡同梁朝偉主演嘅《英雄》，喺舊年冇份角逐奧斯卡「最佳外語片」後，呢部戲喺美國上畫日期一拖再拖，不過聽講買咗呢部戲美國版權嘅Miramax終於肯排六月上呢部戲，但部戲名就改為《李連杰之英雄》（JetLi'sHero），擺明睇中杰仔嘅商業價值比導演張藝謀大！
據聞張藝謀好谷氣，但佢嘅製片張偉平話：「沒辦法，現在片子已經賣出，我沒他辦法，現在我們是經一事長一智，《十面埋伏》絕對不會與Miramix合作。」
其實都唔只張藝謀谷氣，周星馳都遇到差唔多嘅情況，佢部《少林足球》又係賣畀Miramix，但搞到上個禮拜先喺美國冇乜宣傳下搵六間戲院上畫，結果幾日只收得三萬美金，認真慘情。

Race火燒長髮唔知驚
二人女子組合2R噚日到旺角出席一個手機活動，Race話日前喺試鏡嘅時候，唔小心燒燶咗自己啲頭髮，結果惟有將頭髮剪短三吋，又話好痛心，家姐Rosanne都不忘教訓細妹一番，佢話：「佢重話寧願燒到件衫，真係黐線㗎！」Race咁貪靚，寧願燒到件衫都好過燒到把頭髮，馮仁昭都寫個服字畀佢。

劉曉慶盼同農民傾掂數
劉曉慶單逃稅案未了結，佢又因為以前投資化妝品廠同當地農民發生金錢糾紛，搞到日前啲農民專程去咗橫店搵佢還錢，劉曉慶都好驚呢件事會鬧大，因為𠵱家再嚟多單官司，可能會影響逃稅單官司，所以佢秘密返咗北京同律師研究，準備同上京告狀嘅農民傾吓，搞掂先繼續開工。

陳芷菁狂踩無綫刻薄
陳芷菁噚日為亞視嘅《十大電視廣告頒獎典禮》試服裝，佢對於無綫再度減人工表示好關心，佢話：「無綫新制度好刻薄，佢哋要明白藝人行出嚟要風光，咁樣做法，做藝人同做工廠有乜分別？證明當日我離開無綫係明智，無綫藝員大可以嚟亞視，收入會好多。」

張東健唔想做奴隸
最近拍緊電影《無極》嘅韓星張東健，喺戲入面會飾演奴隸，日本男星真田廣之就做將軍。而佢早兩日接受韓國雜誌訪問後，雜誌就屈佢講過話：「最初因為要向日本鬼子下跪，所以唔想接拍。」張東健知道呢件事之後發晒火，話絕對冇講過呢句說話，重話自己只不過係講笑話最初唔係好想做奴隸嘅角色。