日本藝能界年年變化都好大，當地廣告界亦唔例外，最近日本市場調查雜誌《日經Entertainment》調查咗今年身價急升嘅廣告演員係邊幾位，其中渡邊謙最勁，廣告酬勞三級跳，升到超過一億日圓（約七百四十萬港元）拍一個廣告，真係豬籠入水。
渡邊謙拍完荷李活片《最後武士》之後，簡直名利雙收，佢唔止成為荷李活搶手貨，有份擔演新一集《蝙蝠俠》系列電影。渡邊謙喺日本廣告界都唔弱，身價由去年嘅三千五百萬（約二百六十萬港元），升到今年超過一億日圓，差唔多等於上年嘅三倍，真係收錢收到手軟。我羅拉睇見渡邊謙喺益力多廣告入面，男人老狗嘟起個嘴仔飲嘢，man得嚟又幾好笑。
其他廣告薪酬急升嘅藝人，就有青春偶像上戶彩，佢由上年嘅三千五百萬日圓（約二百六十萬港元），升到今年嘅四千五百萬日圓（約三百三十萬港元）。雖然阿彩拍廣告嘅酬勞未及一樣升咗一千萬日圓嘅長谷川京子，今年可收五千萬日圓（約三百七十萬港元）嘅酬勞，但阿彩勝在已有十二個廣告合約喺手，打敗咗菊川怜得九個合約嘅成績，成為新一任日本廣告女王。
而離開咗Morning娘嘅