德國平治汽車（Mercedes-Benz）近年致力為旗下車系推出新一代版本，繼SLK、C-Class及E-Class後，最近又傳來消息，指廠方現正密鑼緊鼓研製新一代A-Class，並預計會於明年初推出市場。
記者：鄭達基
有望於嚟緊巴黎車展展出，並會於明年初登陸市場嘅新一代A-Class，賣相與現有型號頗為相近，但原來細看之下，卻發現車首用上一組新款頭燈及鬼面罩作配襯，就連泵把亦屬新設計，加上變得更圓渾嘅車尾線條及新尾燈設計，與現有型號截然不同。
消息又指出，新車嘅體積會較現有型號有所增加，其中車長增加232mm、闊度增45mm、高度則增多6mm，故此能為乘客營造出一個更闊落嘅車廂空間，匹配前後兩排承托力甚豐嘅座椅，乘坐更見貼服舒適。
為照顧不同用家需要，廠方又特別將新車所採用嘅引擎配搭作出適量嘅修改，部份引擎嘅輸出比現有型號增多約10%，但耗油量卻下降約5%，以求達至慳油好力嘅特性。對新A-Class有興趣嘅車迷，就要密切留意新車在港嘅確實推出日期喇！