地鐵好早就搞自由行團，去佢哋商場購物消費。
地鐵總商場市務經理陳嘉明話，最近有旅行社摸上門，要求帶團嚟地鐵商場購物，希望可以安排招呼。地鐵𠵱家每個禮拜可以接待十團八團自由行，每團三四十人，會安排食物及專人招呼。
不過，啲自由行客面對美食都好似冇乜興趣，細心留意先知佢哋志不在食，想即刻去購物就真。
呢類客首選買手電，跟住係化妝品，同埋喺內地有分店嘅連鎖店貨品，因為可以格價，知道價錢比內地平，就安心大手入貨。不過，早年好旺嘅金飾，原來三甲不入，睇嚟自由行客嘅品味都變得好快，同好跟得上時代步伐。照咁睇，其他行業喺呢方面似乎受惠唔係好大。
陳嘉明話，𠵱家啲自由行客，消費力冇初期咁強，使費由八千降到五千，估計可能係少咗幫親戚朋友買嘢之故。
一般人買樓多數用嚟自住，不過香港人都好注重投資升值，若果揀到個單位，樓價升得多過人，始終都開心啲嘅！
睇番中原城市領先指數，今年第一季升咗三成半，但原來有五個屋苑嘅升幅高過呢個幅度。
升幅最大嘅係鰂魚涌康怡花園，近六成半，平均呎價已經升到四千零七十一蚊；隔籬嘅太古城都唔弱，升咗近六成，呎價四千五百四十二蚊。鴨脷洲海怡半島同沙田第一城都升咗五成九同五成二。至於柴灣杏花邨就升咗近四成九，呎價四千零四十八蚊。
相對其他升幅唔算細嘅屋苑，都只係得兩三成，呢幾個屋苑買嚟自住嘅買家，幾個月內升值咁多，雖係紙上財富，都飲得杯落。
豪宅市旺，吸引好多舊人回巢，入行十年，但喺九九年離開地產代理呢行嘅鄒嘉敏，舊年十二月重操故業，加入中原地產，主力做薄扶林貝沙灣二手，三個月做咗十三宗買賣；單係三月，已經做咗五宗，佣金八十三萬蚊，成為該月嘅全區營業額冠軍。
鄒嘉敏話，當年離開呢行，係覺得樓市跌勢已成，客源減少，故轉做時裝生意，今次有見樓市開始復甦，所以再度入行。佢重透露，今次成績咁好，原來唔少買家係佢做時裝界時識得嘅客人。
呢個世界不斷有唔同形式嘅世界第一出現，樓盤就比較矚目，因為幢大廈會變成該地區嘅地標，好多人談論，所以各地都爭建世界第一高樓，一般都係用建築物最高點嚟計。
日本森大廈株式會社投資嘅上海環球金融中心，樓高四九二米，約一六二四呎，比起台北101金融大樓嘅五○八米低咗少少。不過，佢哋唔認同𠵱家嘅計法，強調101金融大樓高度包埋嗰六十米嘅尖頂，以實際樓身計，上海環球金融中心先至係世界第一高樓，佢哋計劃喺○七年底申請列入為世界第一高樓。
蘭西
電郵地址：
