馮仁昭四圍超：
徐濠縈雲吞當晚餐拉上補下

日前徐濠縈親口承認自己因為鍾意時裝，所以十分大使，不過佢又話唔會理人點睇佢，最緊要係男朋友陳奕迅（Eason）諒解，同埋一樣咁錫佢就得啦。
徐濠縈着衫就天天新款，幾時都會喺佢身上發現潮爆裝扮，佢雖然花好多錢置裝，不過喺食方面就好隨便，前晚佢都係同Eason食雲吞當晚餐，唔知呢啲係咪叫做拉上補下呢？

拎住一大袋外賣
前晚八點，徐濠縈揸住佢架MiniCopper，載住一位女性朋友去到跑馬地嘅上海弄堂菜肉雲吞店，當時徐濠縈拎住幾袋嘢，同朋友行入食肆，但隔唔夠五分鐘，佢兩個又行番出嚟，冇耐Eason嘅司機就拎住一大袋外賣，交畀徐濠縈嘅同行女友，之後徐濠縈就開車走先。
再過咗十零分鐘，頭戴鴨舌帽嘅Eason就同司機一齊離開食肆，只見Eason一邊行一邊拉褲頭，急步衝咗上車，睇怕佢可能係趕番屋企，陪徐濠縈食第二餐。

Shine最緊要唱好歌
Shine近日喺台灣籌備佢哋準備推出嘅首張國語大碟，適逢佢哋所屬嘅EMI行政架構有變動，歌星唱片交由金牌推出，有傳因Shine嘅經理人約唔係金牌所有，故會受影響。徐天佑日前就同記者澄清話：「黃栢高特登打畀我，叫我哋乜都唔使擔心，唱好啲歌最重要。」

許冠英懶理聲帶發炎
許冠英同彭健新噚日喺土瓜灣綵排「至尊金曲聲雅廊encore」演唱會，許冠英話佢呢排聲帶發炎，希望演出嗰晚會冇事。
問到許冠傑復出演唱會籌備成點，佢話：「都OK喇！不過我都冇問過佢有乜嘢構思，我又唔會畀意見佢。」

范植偉女友被疑買冠軍
台灣藝人范植偉女友王心凌嘅新專輯登上銷量榜冠軍，有歌迷認為佢涉嫌買票。噚日王心凌喺慶功宴上就呢件事表現得好難過，話咁講對買咗佢唱片嘅歌迷唔公平，范植偉就力挺女友，送咗個花籃到賀之餘，重寫住「恭喜心凌，真的衝上第一名」，及留咗個署名「真的好朋友——范植偉」。