清明假期之後好快又放復活節假，本周只得3個交易日，照計好多人重放緊假，小初原本以為大市會好淡靜，唔慌有驚喜，但點知又唔係喎，停牌成個月嘅海爾中建（1169），終於落實收購海爾集團嘅洗衣機業務，同埋增持手機權益，而海爾終於成為海爾中建最大股東。
早前好幾單大型注資兼借殼上市交易都令捧場客損手，其中包括和記環球電訊（757），東方燃氣（432）等，兩股復牌後股價雖然一度急升，但跟買的散戶大多以接火棒輸錢收場。不過，經紀陳對今次海爾中建有唔同睇法，原因只有一個，就係海爾中建多大陸炒家捧場，佢哋炒法豪得多，斷估唔會一個朝早就散貨咁肉酸。
小初則有啲保留，因為當交易完成後，海爾中建公眾持股量將少過規定，需要減持，加上中建電訊（138）可能會沽清貨唔玩，因此，就算有關人等有實力頂住個價，但始終有啲戒心，橫掂實力工業股創科實業（669）明日公布業績，電鑽生意繼續帶來豐厚利潤，大部份分析員都估佢靚爆鏡，或者買創科會穩陣多少。
慕容小初