美股上周五因職位數目勁增而急升，昨日亞太區股市，尤其係日台兩地，亦都靚靚，港股今日復市，估計亦會跟埋上去。
港股短期睇好，市值大嘅藍籌有機會做火車頭，滙控（005）會係其中之一。上周五美股勁，但美國金融股冇跟大市上去，滙控亦略低過本港收市價，若今日港市滙控跟埋跌少少，啲滙控Call輪更加抵買，最佳對象係9640。
9640今年9月到期，輪價70仙，溢價3.8%，槓桿率16.8倍，引伸波幅亦唔高，只係28.08%。因為屬遠期輪，萬一正股唔對辦，坐盤坐耐少少都唔驚輸溢價縮減，槓桿率爆炸力亦唔弱。
另1隻滙控Call輪9157，短期啲，6月初到期，輪價32.5仙，溢價3.2%，槓桿率36.2倍，引伸波幅26.32%，波幅會比較大。
地產股有運行，揀地產Call輪短炒亦諗得過。不過地產股已升得幾急吓，等日中稍微回吐之時買佢哋啲Call輪比較穩陣。
地產股對象Call輪有長實9083同9807，新地9118同9417。9083下月底夠鐘，輪價43仙，溢價1.8%，槓桿率15.6倍。9118下月到期，輪價1.03元，溢價0.2%，槓桿率7.2倍。兩隻輪比較近期，所以溢價低啲，炒短期輪至緊要快手快腳。
章盛