人大釋法搞到香港好多人都冇晒癮,白鴿黨主席楊森就好似上咗腦咁狂鬧,連佢老婆都話未見過個老公咁㷫。咁又係,𠵱家即係你中央玩晒,你話今日政制香港有爭拗就釋政制,第日你又可以重施故技,搵幾個曾憲梓、邵善波、鄔維庸之流出嚟日日破口大罵,搞亂個局,然後自己出嚟扮救世主,話釋法「為香港好」,咁粗劣嘅伎倆,香港人點會睇唔穿?
被中方點名謾罵而人氣再急升嘅李柱銘就話北京今次直情係先發制人,將把尚方寶劍從劍鞘拔出放喺度,一於唔收番,等你哋知驚,但係咁樣一嚟,《基本法》就變咗一叠廢紙。
而其實《基本法》一百五十八條雖然寫明《基本法》嘅解釋權屬人大常委,亦同時授權香港法院可以對自治範圍內嘅條文「自行解釋」,或者由終審法院喺終局審判前提交人大常委釋法,𠵱家一味人大常委出手,香港當然玩完。
傳真︰2623-9278
電郵︰