人一走，茶就涼，政府上星期推翻前財政司司長梁錦松嘅決定，唔將港交所嘅上市審批權轉交證監會。加強監管無望，有唔少人好高興，但股壇長毛DavidWebb就唔多「乃奇」。佢發表文章批評政府做法冇理據，就算話增加證監嘅監管權，都強調係分階段進行，十足《基本法》講香港嘅民主進程——「循序漸進」，但睇番《基本法》九○年頒布以來嘅進程，真係令人擔心香港嘅市場改革都係咁款。
阿Webb又話，要改善上市公司管治質素，披露資料好重要，梗係要由最高層起帶頭作用。不過，佢舉咗特首董建華嘅家族公司東方海外為例，八十年代中期因為陷入財務危機，要搵人打救，霍英東代表一家非洲利比里亞註冊嘅公司，注資一億二千萬美元，但係呢間公司擁有權就從未披露過，只係老董喺九六年競選特首時曾提過，當年獲得中國政府協助。如果連老董都冇呢種意識，又點推動公司管治呢？阿Webb又話，老董係由八百人選出來，其中唔少係上市公司負責人。哈，咁算唔算利益衝突呢？
傳真︰2623-9278
電郵︰