中國人好多都相信風水，成日都話個袋放啲乜、床頭擺啲乜就可以趨吉避凶，不過估唔到日本人都興呢家嘢，例如佢哋相信五一年至五八年嘅十日圓硬幣，或者印有十個牛奶妹頭嘅糖紙，會為佢哋帶來好運等等，而日本女星都各有佢哋特別嘅求運怪招。
好似早排有記者見黑木瞳為舞台劇《mamalovesMANBO》首日公映時，成身金器，淨係戒指都值二萬幾港紙，原來大女優話：「逢親第一日開工，都係最驚㗎！」佢認為金戒指，可以保祐佢同定驚喎。
而身為東京大學畢業生嘅菊川怜，居然同一般婆仔一樣信邪，原來佢拍日劇《OL錢道》時，聽人講用黃色嘅銀包會提高財運，自始之後，佢就一直用黃色銀包啦！就連成日俾人話喺藝能界入面人緣唔好嘅佐藤珠緒，都係用呢個方法減少破財。
佐藤話：「我聽過識風水嘅形象設計師話，改用黃色嘅銀包比較好，我用咗之後，真係浪費都減少咗。」既然真係咁靈，就應該問埋個設計師，用啲乜可以增進吓自己嘅人緣運啦！