劉德華與張栢芝成為今屆金像獎影帝影后，昨日大會公布各獎項三甲分數，華仔與栢芝均以大比數拋離對手，栢芝憑《忘不了》得獎，又以《大隻佬》排名第二，相加起來栢芝得票超過六成。而失意影后獎的吳君如，卻認為沒必要公開票數，輸了不用檢討分數，贏了更不用知道獲多少分。
第二十三屆香港電影金像獎前晚已順利舉行，劉德華與張栢芝成為今屆影帝影后，自是喜上眉梢，但有人歡喜有人愁，金像獎昨日公布各獎項的三甲分數（見附表），以增加透明度，變相公開第四及第五名包尾得主。
前晚最受矚目的影帝影后殊榮，華仔與栢芝均以大比數拋離對手，栢芝憑《忘不了》得百分之四十七點二的票數，她亦憑《大隻佬》得百分之十四點七的票數，兩片加起來，栢芝得票超過六成，第三位則是吳君如。
而華仔則憑《大隻佬》獲百分之三十八點三的支持票數，比排第二、曾揚言自己演技比華仔好的吳鎮宇高出近一倍票數，而劉青雲與吳鎮宇只相差甚少，任達華及張學友可說是包尾男主角。
對於以大比數拋離對手，華仔昨日在電話中說：「開心同有少少意外囉，我真心覺得其他四位影帝都做得相當好㗎。我諗除咗評審覺得我演得好，有努力之外，大家又錫我呢，由『金紫荊』之後，我幾乎每遇到任何一個人，佢哋都同我講話我實得，搞到我好感動，我覺得入行二十幾年嚟，贏到咁多友誼比贏到獎項更重要，好多謝所有錫我嘅朋友。」
不過，失意金像獎的吳君如，昨天在尖沙嘴為有份配音的電影《狗狗震多震》出席首映時，問到金像獎大會公布獎項票數，君如說：「賽果正常，因為栢芝第一次攞實大比數拋離，預咗唔輸畀《忘不了》都會輸畀《大隻佬》。」
君如續說：「但我覺得冇必要公布票數，𠵱家又唔係賽跑或者小學考試，輸咗唔使檢討分數，贏咗更加唔使知幾分。我都有問過文雋，佢話杜琪峯想透明度高啲，為一個人令其他人尷尬。我唔係針對杜琪峯，對於我嚟講一啲都冇所謂，今次分數都好正路。」而杜琪峯在另一場合接受訪問時對此說：「之前我唔係咁嘅意思，算啦我覺得大會增加透明度公布分數都係好嘅。」
吳鎮宇昨日接受電話訪問則說：「今年公開票數，我唔介意，比賽得就預咗，唔好介懷，要有體育精神，人哋做得太好，劉德華喺《大隻佬》又文又武，又講佛偈。」
採訪：何永寧、魯萍、娛樂突發組
攝影：陳志嵐、何國豪、仇志德
