米禾爾禮拜日喺足總盃淘汰新特蘭，創會以來首次打入決賽同埋破天荒參加來屆足協盃，搞到倫敦市洋溢住歡樂氣氛；重唔只咁，賽前應承過如果米禾爾打入決賽，佢哋嘅主席柏希迪斯話會喺街度裸跑，今次真係好戲在後頭嘞！
我求大俠唔知對柏希迪斯嘅勇氣或鹵莽好嬲定好笑，總之係佢口出狂言目的都係想隊波有成績。佢重話牙齒當金使，向職球員發獎金，兼出錢請佢哋去迪士尼樂園，又一定會裸跑。之不過佢就最怕裸跑嗰日會凍，因為單係禮拜二至四嘅天氣預告指溫度都係徘徊喺攝氏五至十一度，重有驟雨㖭。
我求大俠諗過，佢可以學新鮮出爐影帝華仔咁，着住件「大隻佬」肌肉道具，咪可以瞞天過海，跑起上嚟應該都幾熱㗎，咁咪冇咁易冷傷風囉。
潮流興轉國籍代表其他國家嘅國家隊，呢股風氣亦吹到英格蘭，效力阿仙奴嘅伊度就話考慮會代表英格蘭國家隊。由於巴西遲遲唔選伊度入國家隊，佢話心淡，重話想代表英格蘭。原來，除伊度外，車路士龍門古迪仙尼同埋查爾頓前鋒迪肯尼奧，都合資格代表英格蘭㖭！
英超紐卡素前鋒比拿美打算喺夏天到瑞典超級聯賽隊效力，唔通喺紐記唔開心？唔係，只係比拿美因膝傷唞咗大半季，覺得自己狀態唔夠弗，諗住喺夏天時加操，外借到瑞超聯球隊。我求大俠諗，由於濠江有瑞超聯賭，咁波友不妨吼實比拿美會去邊隊，然後過大海落注！
只不過時值四月初，意甲安科納已經率先降班，係近年歐洲各大聯賽嘅異數。諗起班過氣老將好似根斯、甸奴巴治奧又要為前途奔波，令我求大俠諗起明日黃花呢四個字。講時講，安科納已經將意甲歷來不勝紀錄增至二十八場，唔知收咧前開唔開到齋呢？
AC米蘭前鋒恩沙基近期頭頂腳踢瓣瓣——冇，繼上周對基爾禾單刀炒飛機後，前日對摩德納又屢失戎機，結果被意大利傳媒潤佢獨「吞」兩個入球，又有統計指佢今季平均三百幾分鐘至入一球，好唔掂。回想上季基仔發光發熱，家吓就成為罪人，佢真係要爭氣囉。