鄔曾反港集團喺北京借出席人大常委會為名，再次發表反港言論。鄔維庸竟然將攻擊嘅矛頭直指董建華，批判阿董同香港人「脫咗鈎」，呢番說話，揀正喺北京講，即是明向中央人民政府過阿董一戙，話我哋董生完全唔可以代表到香港人。
七一之後，親中陣營反轉豬肚，最先掀起一股批董暗流。明明昨天重保董、挺董、舔董，一見到胡溫幾次大讚何厚鏵，同埋判定江主席失勢，就紛紛遠董、棄董，甚至倒董。
例如兩會期間，啲特區老左再次大肆攻擊誹謗香港電台，話香港電台變為民主派言論基地，呢啲就係陰謀架空阿董最惡毒嘅一招。
知情人士指出：香港電台早已招納親中極左分子上台開咪，例如屢次抹黑媽田Lee嘅劉廼強，已成香港電台赤色名嘴，重有邵善波，亦久不久就上港台大罵漢奸賣國賊，大吹釋法有理。港台嘅周融，亦一早親晒政府，女主持如張笑容等，亦曾經對劉慧卿落井下石（女人蝦起女人上嚟，格外無情）。但親中左仔尚未知足，你向佢讓步一寸，佢就要夠一丈，最近又郁香港電台，而且吠來吠去。嗰一老半嫩嘅親中分子，喺九七前後唔係支持楊鐵樑做特首，就係擺明怨阿董冇派餅仔畀自己嘅失意人士。
反為唐唐做資訊科技局長嗰陣，好維護港台獨立編採方針，而阿董亦覺得港台冇乜問題。消息人士話，阿董私底下查實都好愛錫前廣播處處長張敏儀，對ManYee情同慈父，畀佢去山明水秀嘅日本歎世界，但咁又令到親中左仔們更加怒火中燒，佢哋學咗大陸權力鬥爭方式，不斷衝擊港台，呢招叫做「敲山震虎」，真正嘅打擊目標，就係前科技資訊局局長唐唐，唔想佢再上位做第三屆特首，同埋現任嘅曾俊華（曾俊華係當奴馬房精英，左仔郁港台，亦係一支暗箭射埋煲呔曾），最大嘅目的，就係要不斷號令阿董聽佢哋指令做嘢，迫阿董郁埋現任。
親中老左分子當咗阿董係宣統皇帝，當正自己係攝政王，當阿董係傀儡，自己就係太上皇，不斷上京透過種種渠道，喺胡溫面前數臭唱衰我哋阿董。可憐阿董七年來，好似一塊田咁攤喺度，任呢班蝗蟲低飛啃食，𠵱家食晒嘞，呢班昆蟲就嗱嗱臨搵過第二塊田再啃過。蝗蟲食乾淨一塊田，唔會喺度屙埋，但左仔靠董吃董，跟住就插董倒董，恩將仇報，唔怪得連葉公公國華都於心不忍，前日嗌咪，叫啲左仔支持阿董同當奴施政，畀阿董安安樂樂玩埋呢兩三年。但又點勸得聽？當年李自成殺入北京，崇禎皇帝啲舊臣都紛紛叛明，向李闖賊下跪嗌萬歲喇，宮廷政治就係咁現實。
所以，消息人士話阿董人老實，對班左王咁好，估唔到慘遭左王背叛，下屆特首命運亦會相同。𠵱家呢個時勢，香港人要認清楚邊啲至係真正倒董亂港分子，就好似當年，就算幾唔妥蔣中正總統，兇殘百倍嘅日寇侵略中國，四萬萬人都以日寇為公敵，支持蔣總統施政喇係咪，而阿董係咪應該聯同民主派，抗左防共效法吓當年國共合作咁呢。
傳真︰2623-9278
電郵︰