世界盃外圍賽「中國對香港」在香港舉行，聽講由於大球場經七人欖球賽一役後，需要好好養草，所以外圍賽要在小西灣運動場舉行。
首先要睇地圖，唔睇唔知原來小西灣喺柴灣，放棄揸車念頭，改搭的士。小西灣運動場啟用不久，一切新新淨淨，草地尤其綠油油，但確係啱中小學用作開運動會啲，草地外圍有多線跑道，球迷與球員的距離大大增加，就算坐第一行都睇唔清楚球員個樣，又冇得趁球員掟界外球或開角球時跟球員互動對話，又冇得直接問候出彈弓旗的旁證，又冇大電視重播入球片段，睇波氣氛大減。
唯一好處係球場面積夠晒細，二十人迫埋一堆密質質，莫講話畀個靚直線入楔，就算係想低頭疾走哨一段都冇空間，基本上用平時開角球嘅力水經已由呢邊角斬到嗰邊角，龍門腳骨力好啲都可以直接由呢個龍門射去嗰個龍門，啱晒香港隊穩守突擊嘅作風。
今次睇波最有趣嘅係第一次體驗到兩隊球迷對壘嘅氣氛，中國球迷人數較少但大鑼大鼓，香港球迷人多勢眾但叫口號完全唔齊。中國球迷更大膽地放煙花，以意大利式方法祝賀入球，警員們連忙昅到實。
老實講，放煙花雖然係離譜，但係又真係好有氣氛。