九月立會選舉，首先響起戰鼓聲嘅功能組別，竟然係資訊科技界，現任嘅民主黨議員單仲偕應該唔會意外，因為每次呢個界別都有人同佢爭，所以今年單仲偕一早就出動，四出向界別選民拉票。
令單仲偕嚴陣以待嘅對手，係快譯通即權智老闆譚偉豪。譚生同八方講，佢正積極考慮出選。原來單、譚兩人重係老相識，同是IT人，單仲偕嘅細仔同譚生兒子同就讀小拔三年級，一個讀A班，另一個讀B班。
譚偉豪重同八方講，台灣大選搞出套大龍鳳，連槍擊咁戲劇性嘅情節都出現埋，佢有一次同單仲偕講笑，叫對手到時唔好出呢招，咁即係當咗民主黨係暴徒，單仲偕亦笑言，香港選民唔受呢套，一定冇效，叫佢放心。
譚生想踏足政壇，得到太太Vivian大力支持，Vivian形容丈夫份人唔停得，做咗十五年生意，想試吓新嘢。講起嚟佢兩夫婦都幾合拍，老公讀中大電子系畢業後做繙譯機，太太就出身港大中文系，幫手搞電子字庫，不過佢政治立場係乜呢？咁就有少少敏感嘞。
（圖）權智主席譚偉豪與太太梅嘉慧乃夫妻檔，丈夫今次若參選，譚太話一定支持。
傳真︰2623-9278
電郵︰