香港骨髓捐贈基金（簡稱骨髓基金）為慶祝本港完成第二百宗無血緣骨髓移植手術，早前特別安排七對捐髓者與受髓者會面，蘋果日報慈善基金作為是次活動嘅贊助機構之一，大使好開心見證呢個感人場面。
骨髓基金同世界其他骨髓庫一樣，一直嚴守保密原則，即係話，病人同骨髓捐贈者嘅身份係絕對保密，所以呢次「施與受首度共聚」嘅安排，可以話十分難得。
事實上，人海茫茫，要搵一個骨髓同你完全脗合，機會係五千分之一，實在唔容易，所以有搵到合適骨髓得以逃出「鬼門關」嘅血癌康復者，頻頻話自己好彩。
大使睇住一對對「有緣人」相認，感覺好warm，有受髓者用「再生父母」、「救命恩人」嚟形容佢哋嘅「另一半」。其中一個環節，係七對「有緣人」互贈禮物，有人送水晶、有人送啤啤熊、有人親手畫感謝卡，大使就最欣賞其中一位捐髓者，佢送咗一個萬花筒畀佢嘅受髓者，寓意病者康復後有一個燦爛美麗嘅人生，相當有意思。
講開又講，每個骨髓移植個案，事前都要花上好多準備工夫，雙方嘅驗血同身體檢查費用，可能要用上幾千蚊，所以沒有獲政府資助嘅骨髓基金，好需要各界支持，讀者可透過蘋果基金捐款。
捐款編號：C1338
暖流熱線
電話：29908688
傳真：23702192
電郵：
網址：