特區自從親中派搞起文革，出現「政治大陸化」，親中言論機器及鄔曾仇港集團，不斷謾罵「漢奸賣國賊」，點知陳水扁一聲多謝，總統大選冧莊，中方惱羞成怒，宣布人大釋法，而特區嘅民主抗爭，經過周末學聯示威、傳媒記者遭到警方毆打，就進入「抗爭台灣化」嘅時代。
在一九六七年波瀾壯闊嘅反英抗暴鬥事中就經已被我親中愛國同胞定性為「黃皮狗」嘅香港警隊，對付和平示威者，動用「勒手鎖腳插鼻窿」嘅鷹犬式暴力，經已引起國際傳媒關注。而事後警務處處長高佬李，反指記者「妨礙警方工作」，重以一副共官嘅口脗，訓令傳媒要「檢討」。
包括大紫荊章得主、當年反英抗暴鬥爭領導人楊光在內嘅親中愛國同胞，對於黃皮狗嘅結構性劣行，一定好有認識，所謂黃皮狗者，即只夠膽對付手無寸鐵嘅示威者，欺善怕惡，主人落三分柯打，佢就落力足十分。維園阿伯追打司徒華，未見過有警員出頭，高佬李所領導嘅警員，當午夜紋身黑幫喺佐敦對佢啲差佬指口篤鼻，公然挑釁話「呢度每晚十二點鐘之後我話事」，差人頭耷耷，唔敢還嘴，幾時見過警察敢對午夜十二點鐘後話事嘅江湖大佬勒手鎖腳塞鼻窿？
唔通啲黑社會係粗人，冇教育，所以鼻哥好蝦人插，有高度厭惡性。而反釋法嘅示威者，由於教育水平高，又有大學生，個鼻哥窿清澈好多，所以唔怕插多幾嘢？
講番高佬李，佢嘅處境都咪話唔騎呢。當年肥彭嘅BBC死黨大衞．丁布加，帶攝影師嚟香港拍咗套紀錄片《末代港督》，裏面有一次專訪當時重好低級嘅高佬李，高佬李擺出一副文天祥表情，好悲壯咁話：若然九七後，港人有和平示威，要佢執行一啲違背良心嘅暴力決定，佢一定唔會違背良心，佢會唔撈，咁話。
唔怪得連特首前高級特別助理葉公國華，喺電台都充滿惆悵咁話，原來香港喺九七後，需要至少十年「磨合期」，當初以為換一支五星旗、換一個黃面佬做港督，就可以萬事大吉，呢種諗法係好幼稚。
咁即是話：收回香港主權，以為自己搞得掂香港，成個理念都好幼稚。「英國人做得到的，中國人也能做到」，死鬼老鄧同錢其琛當日呢句假大空，今日一諗起就好令人發笑。
冇個白皮豬睇住檔，警隊一旦由大紫荊楊光所講嘅黃皮狗當家作主，連管理示威，都冇大冇細，擒擒六大失方寸，做警察，大街大巷，要隨時伸手指插入市民嘅鼻哥窿做另類通櫃，試問呢一行，又點會吸引到胸懷大志嘅年輕人加入？
傳真︰2623-9278
電郵︰