由張藝謀執導、劉德華、金城武同章子怡主演嘅電影《十面埋伏》，劇情一直好神秘。馮仁昭最近就八到個故事結局，原來章子怡最後死喺金城武嘅懷抱，同《英雄》結尾梁朝偉死喺張曼玉懷中都幾相似。
個古仔話捕頭華仔同金城武同時愛上章子怡，原本章子怡係鍾意華仔，但後來先發現自己最愛嘅係金城武，於是佢哋就發展感情喇！而華仔就因愛成恨，萌起殺死章子怡嘅念頭。
套戲嘅結尾，華仔同章子怡會喺花海展開大戰，當章子怡奄奄一息時，金城武就趕到相救，同華仔展開生死大戰。華仔起初佔盡上風，就喺生死關頭，章子怡使出玉石俱焚一招，保住金城武性命，而自己就同華仔同歸於盡，最後死喺金城武懷抱。
而劇組人員同馮仁昭講，華仔嘅角色並唔係奸角，佢只係做一個由愛生恨，令心靈扭曲嘅悲劇人物啫，況且部戲冇正邪嘅界定。
2R噚日清明節喺粉嶺出席活動，佢哋話好細個時外公已經去世，嗰陣佢哋好鍾意拜山，因為有得野餐喎，到大個時梗係唔鍾意啦，因為知道有親人去世先要拜山嘛！2R又話婆婆啱啱過身，佢哋媽咪拜完山後重擲勝杯，話婆婆𠵱家好開心。馮仁昭覺得唔想導人迷信，但最緊要有孝心！
陳慧琳（Kelly）前晚着到鬼咁密實出席《護苗基金星輝夜》，馮仁昭問佢點解，佢就話因為傷風關係，所以先至包到冚一冚。Kelly重笑笑口話嫌唔夠暖，差啲着埋皮草出場㖭！而前晚嘅活動由蕭芳芳發起，Kelly話見到芳芳姐事事親力親為，自己都好感動。
周渝民（仔仔）喺台劇《戰神》入面，做個好隨便嘅男人，除咗有女朋友大S徐熙媛外，重同唔少女人有霧水情緣。日前仔仔同另一女主角蕭瀟拍戲，原來蕭瀟第一次同仔仔做對手戲，佢話仔仔好鍾意扮鬼臉，搞到好容易分神，重成日要忍笑，認真曳！
蔡依林同王力宏入圍台灣金曲獎最佳男、女歌手，新力唱片噚日提前幫佢哋搞慶功。佢兩個重約好到時以王子同公主嘅裝扮，攜手踏上金曲獎星光大道嘅紅地氈。而蔡依林知道入圍後，心情一直好興奮，而王力宏就猛叫佢輕鬆啲，重叫佢當晚着條幸運內褲，馮仁昭都祝佢好運啦！
陳文媛（BoBo）噚日去慈雲山出席活動，佢話稍後會幫無綫拍個二十集嘅一分鐘汽車節目。講到最近無綫實施新政策，一分鐘嘅節目只當○點二個騷計，BoBo話：「無綫同我傾呢個節目時都話咗畀我聽，其實歌手一向同無綫做嘢都唔會有好多錢，都係攞車馬費，始終我哋志不在此，當係做吓宣傳同學嘢。」
