N公子多年前與友人在蘭桂坊投資，開咗一間小型餐廳酒吧，生意不俗，但後來業主不斷加租，四百呎舖面，加到月租八萬五，N公子計唔掂數，立即將間餐廳賣咗，賺番少少就鬆人。
眨吓眼過咗成十年，嗰間餐廳重響度，招牌冇變，但舖租就越來越高，N公子都唔明白人哋點解做得掂。
左丁山最近得知，N公子當年租落嘅舖位，最近已加租至十九萬五千蚊，真係聽見都伸條脷出嚟。賣啤酒原來咁好賺嘅咩？問餐廳羅：「啤酒賣幾多錢一樽呀？」餐廳羅笑笑口：「揸一張紅底，再加十元硬幣，就夠你飲兩樽。」嘩，原來四十八蚊再加一，貴到飛起，一個月賣三千七百樽，即係每日賣一百二十二樽就夠交租，咁又好似唔係好難喎。啲外籍人士起碼飲三個round，夠交租有餘，再賣吓漢堡豬扒，直情有錢賺㖭。
既然咁貴租，店舖就值錢。呢間舖頭上個月以四千五百萬元出售，今個月餐廳羅就收到風，買家在市場以五千萬元求售，以年租二百三十四萬元計，回報率有四厘六八，分分鐘賣得成。唔怪得曹仁超成日講，香港地搵食艱難，發達容易。史丹頓街嗰邊嘅蘇豪區呢幾年甚為興旺，多咗好多餐廳，一位餐廳老闆對左丁山講：「全憑蘭桂坊之父盛智文關照，佢做到蘭桂坊咁旺，餐廳收費好貴，人客食唔起，好多人都係嚟蘇豪食飯，食完落蘭桂坊飲酒嘅！」