美國女歌手珍納積遜（JanetJackson）最近為咗宣傳新大碟《DamitaJo》，連日來馬不停蹄四周圍飛，繼日前喺紐約宣傳完，佢前日又去咗洛杉磯出席電視節目。不過電視台為怕珍納又有出位舉動，又將直播節目延播七秒，認真誇張！
珍納前日上咗個好受歡迎嘅節目《OnAirwithRyanSeacrest》度做嘉賓，應邀喺購物商場唱咗新碟兩隻歌，當日唔少歌迷聞風而至，吸引到三千個以麻甩佬為主嘅fans捧場。因為單露乳事件衣着收斂咗好多嘅珍納，當日着住件露臍裝大跳勁舞，啲fans當然睇到眼都唔眨啦！
當日電視台主持亦都問番珍納，佢近排成日戴住隻鑽戒，究竟係咪男友JermaineDupri送嘅訂婚戒指，點知珍納話只係普通小禮物喎！不過我羅拉察覺到，珍納前日肚臍戴住嘅臍環，亦係寫住JD，即係佢男友個名嘅縮寫，就算佢兩個唔係真係結咗婚，都一定唔係玩玩吓嗰隻喇！