煲碟王：<br>《反斗靈貓》不請自來搗蛋兼拆屋

呢期真係西片跑贏大市，上星期出嘅《Matrix3》去勢一直凌厲，重霸到落本周熱賣3區DVD冠軍；今個星期新片落場，都一樣係西片掛帥——《反斗靈貓》，爆笑、搞鬼、改編自經典漫畫，所以舊年年底戲院上畫時，都揀正聖誕重要檔期推出，今次3區DVD又食正復活節檔前夕，放假尋開心煲碟一族，冇理由唔睇啫！

記者、攝影：朱崇德

驟眼睇呢套《反斗靈貓》，真係有啲唔明點解呢隻6呎巨貓，頭攜紅白間條帽嘅怪物魅力何在？原來佢係改編自1957年美國著名兒童繪本故事書Dr.Seuss作品《TheCatintheHat》，講真！佢嘅家傳戶曉程度，真係差唔多等如我哋嘅《老夫子》，今次首度現身大銀幕，難怪在外國票房大收旺場。

■城鎮設計非常富有夢幻色彩，絕對是大成本製作。

靈貓失控夠搞鬼
故事主線講述一個沒有爸爸的單親家庭，哥哥康威是一個搗蛋大王，妹妹莎莉則是一個蠱惑精，兩人經常搗蛋兼拆屋氣壞媽咪；一日兩兄妹因滂沱大雨獨困家中，忽然反斗靈貓不請自來，起初兩兄妹同佢玩得好開心，點知呢隻貓愈玩愈失控，真係將成間屋拆散，媽咪招呼大老闆嘅Party已迫在眉睫，究竟呢單嘢點收科呢！

■靈貓一到，天下大亂！連金魚都變到識講嘢！

凸務之王扮大貓
講到全劇最搶鏡者，當然係隻反斗靈貓啦！唔講唔知佢原來係由《凸務之王》米克美亞斯飾演；不過最令人驚歎者，是他面帶貓面具，一樣可以有面部表情的演繹，再加電腦動畫的特別效果，感覺同真人一樣，真係不得不驚歎荷里活的特技化妝技術。至於演繹手法方面，由於是兒童電影關係，對於屎尿屁一類笑話，今次凸務之王已經大為收斂，不過低胸裝美女及拆祠堂一類笑話還是時有出現，有時真係有啲唔明係拍畀大人睇、定細路仔睇！
故事寓意亦唔錯，在反斗靈貓的「反面教材」下，兩兄妹最後都明白乜嘢叫「玩得過份」，不過寫得半明半深，絕對要家長陪同收看嘅「PG」解讀類別。

■《TheCatintheHat》其實出自美國著名的兒童繪本故事書。

■無端端，突然屋企走出一隻6呎巨貓，康威兩兄妹起初真係俾佢嚇死。

■原來呢件貓衫是以安哥拉貓毛加人頭髮做成，只重3磅，不過裝身時間頗長，要成2?小時。