英皇每年都會力捧新星，今年主力催谷十六歲美少女梁洛施（Isabella），換言之英皇也會將最好的資源放在她身上，身為3T小花的Yumiko會否擔心失寵？
Yumiko說：「長江後浪推前浪，但每個人有佢自己嘅特色同風格，自己當初出道時，公司都曾經將好多資源放喺我度，冇乜話失唔失寵㗎，我做人師姐，應該takecare啲新人，我唔會呷埋呢啲乾醋嘅。」
曾有報道指Yumiko要唱K應酬，早前更有報道指她為應酬而去遊船河，Yumiko卻懶理，還揚言報道刊登後，她仍然去唱K，不受任何影響，她說：「公司係樹大招風，我家人唔喺香港，就算呢次我入醫院做割鼻瘜肉手術，都係公司同事照顧我，煲湯畀我飲，成班人一齊唱K、一齊玩，有乜問題啫？我唔覺呢啲係應酬喎。不過，我做呢行都預咗啲人多嘢講，𠵱家講嘅嘢，已經比我預期中好，我好安樂㗎啦！」
Yumiko理直氣壯說：「我哋公司有自己嘅地方，唔通公司有地方唱K就唔去，去幫襯人哋咩？我哋唱K唔使畀錢，有老闆（楊受成）簽單，有得食又有得玩，自己嘅地方又有安全感，唔知幾好呀！」
Yumiko的新碟暫定在六月推出，不過自從在農曆年後，本地唱片市道可謂一潭死水，Yumiko對此說：「我唔知𠵱家啲人係咪覺得買碟係好out嘅事呢？個個都用MP3，但點都好，都要繼續落去，自己再勤力啲啦。」
採訪：朱倬誼
攝影：林德雄
服裝及飾物：SistyrMoon/Hysteric
場地：HystericGlamour
髮型：MikeWong（Chin.G）