呢排因為政改問題，搞到天怒人怨，高官、巿民同傳媒都拉到緊晒。無官一身輕嘅梁錦松走得快，無損上等人生活，前晚罕有咁拖埋國寶太太伏明霞出席公開場合，應鄭維志邀請參加外展訓練ball。好耐冇見嘅小伏已經完全收身成功，連鄭維志見到都上下打量，大讚一番。
八方見小伏面容重係幾圓潤，不過腰圍應該都回復番廿五、六吋，唔知係咪缺少去ball經驗，小伏着咗件黑色長袖衫配黑西褲，斯文有餘，隆重不足，拍住着黑禮服、打煲呔嘅老公，同滿場着晒晚裝嘅女賓比較，小伏都係casual咗啲。八方問佢有乜嘢忙、阿囡點樣？小伏都好cool，全程不望人、不回頭、不回應，普通話、廣東話一樣唔睬。阿松見老婆俾人狂影，即刻問隔籬位借部數碼相機，教小伏睇相、玩機，𠱁得小伏笑逐顏開。
（圖）阿松拖埋小伏去ball，不過小伏一身衣着似乎唔夠隆重喎！陳志嵐攝
傳真︰2623-9278
電郵︰