德國寶馬車廠於早前宣布為旗下新款5系推出Touring旅行車版，最近廠方就公布更多關於新車嘅詳細資料，並可望於五月中旬應市。
記者：鄭達基
快將推出嘅新款5系Touring旅行車，其車頭造型與現有四門房車型號相近，並沒有太大改動，但新款特點係車尾門及尾窗可獨立開啟，以便提存儲於尾箱嘅物件㗎！引擎配搭方面，暫時廠方為其安排有一台能輸出192匹馬力嘅2.5公升引擎（525i），同埋頂級545i型號所採用嘅4.4公升（馬力333匹）型號，加上較舊有型號來得更輕嘅車體結構，因而令性能表現予人毋庸置疑之感。
至於車廂方面，由於屬Touring旅行車設計，加上尺碼較上一代型號有所增加，故此尾箱空間來得甚為寬敞闊落，遇有需要時更可將後排座椅完全複摺放平，從而令尾箱容量有所增加。設備配搭則與現有5系房車版相近，有齊i-Drive系統、原廠冷氣及高級音響外，用家又可為座駕選配ActiveSteering、DynamicDrive等配備，以迎合不同需要。未知身處香港嘅車迷，何時能與之見面呢？
