八方噚日同班政壇中人飯局，話題梗係離唔開政府總部清場，席上人士眾口一詞狂插「新一哥」李明逵連記者都郁，惟獨幾個社運老手粒聲唔出，八方問佢哋為乜咁靜局，其中一個人好唔好意思咁講：「我哋中大校友出咗李明逵，重邊有面出聲！」
八方呢個時候先想起李一哥係中大「優良出品」，不過呢單清場事件後，已經變咗「中大之恥」，好多中大校友都擰晒頭，覺得好冇面，同樣係中大出品嘅民主黨立法會議員張文光一講到有李一哥呢位校友，都同八方講：「作為中大校友，有呢位校友我真係覺得好遺憾！」張文光重話，一哥喺中大讀書年代，唔少中大學生都全力投入社會運動，反抗港英殖民地劣政，維護民族尊嚴，「當年捉葛柏又好，保衞釣魚台又好，中大學生都企喺運動前線」，參與社運已經係中大文化一部份，「你李明逵喺呢種文化下成長，𠵱家反過嚟打壓學生，我只可以講，作為中大人，真係好遺憾」。
八方聽聞有班中大校友見李一哥完全忘記晒中大師長教誨，都恥與為伍，有中大校友重私下商量緊可以有乜行動，同位高權重嘅李一哥劃清界線㖭。
（圖）政府總部清場，中大畢業嘅李明逵連記者都郁，搞到中大校友冇晒面。
傳真︰2623-9278
電郵︰