現年二十二歲的鄭希怡（Yumiko）出道短短兩年已名利雙收，去年她賺取了人生中的第一個一百萬，笑言看到銀行存款時，簡直呆了。而她因與成龍傳緋聞而被稱為「龍嫂」，她坦言與成龍的緋聞長寫長有，更自嘲：「我同佢已經抹唔甩！」
「同成龍抹唔甩」
現時二十二歲、出道兩年的鄭希怡，去年已經賺取人生中的第一個一百萬。她笑說：「其實係好彩，舊年同今年都接咗好多廣告，廣告價次次都升啲，多謝公司啫。我記得舊年賺到第一個七位數字，我睇到銀行嘅存款時係呆咗，以前我邊會諗到自己二十一、二歲已經賺到第一桶金，感覺好似發夢咁。」
Yumiko的師姐容祖兒及Twins已先後置業，未知Yumiko何時才能榮升業主？她說：「有排，因為我想買複式，但複式好貴，我𠵱家只係夠買塊廁所板，下個月我會學車，今年希望買架車先，雖然我唔識理財，但我一定唔會亂使錢，我覺得Mani（經理人霍紋希）講得啱，唔好第日老時攬住堆衫喊，所以平日我都係着贊助嘅衫。」
本來Yumiko還有機會多賺一筆可觀的廣告酬勞，但她卻推掉了，因為廣告商請她拍的是豐胸廣告，問Yumiko為何捨棄有錢賺，又可改變身材的良機？
Yumiko笑說：「好彩我係平胸咋，如果胸大，啲人會將焦點落喺個胸度，我唔想畀人肉彈豔星嘅感覺，況且平胸唔會令跳舞有負荷，老咗都唔會墮，我唔知幾鍾意呀，所以我從來都冇諗過去隆胸，我知有人搵過我拍豐胸廣告，但公司幫我推咗，錢搵唔晒嘅，要長遠計同啱自己囉。」
Yumiko因與成龍傳緋聞而得了「龍嫂」的稱號，令她在娛圈中名聲漸隆。Yumiko呼冤道：「做乜要話我啫，係因為佢送咗隻表畀我？但3T個個都有㗎啦，啲人又冇證據，又冇影過乜嘢相！」
Yumiko與成龍的緋聞傳得甚囂塵上，問她會否因此而令其他追求者卻步？她苦笑說：「斷我米路吖嘛！定係我冇吸引力呢？未入行時重多人追，入咗行之後就真係冇乜，可能我個人唔主動，生得又高，啲人會以為我唔容易相處，自己都愈嚟愈自閉，識朋友嘅機會都減少埋。我唔明啲人點解講咁耐，成日講我同成龍，唔悶㗎咩？但又長寫長有喎，我諗唔知幾多年之後，啲人都重講緊，呢啲係record，我同佢已經抹唔甩！」
Yumiko強調與成龍是不可能的，她說：「我唔可以接受有婦之夫，佢係一個好好嘅前輩，會takecare啲新人，佢同Joey（容祖兒）手挽手行星光大道就冇事，唉！不過我覺得冇嘢就唔需要尷尬，亦唔需要避忌，只係唔想再同佢個名扯埋一齊，啲人見到我嗌我做『龍嫂』多過鄭希怡嘅！」
此外，Yumiko昨日首次在公開活動唱現場及跳勁舞，她笑言做完割鼻瘜肉手術後，未可自己清潔鼻孔，所以日前要醫生為其清潔，卻竟積聚了一大舊髒物，令她大吃一驚。
