本欄首次登場，閒話少講，埋位搵錢要緊。
恒豐金業（870）假前由1.5元突見冒升，於1.6元暫見收步，但買勢之急，資金偷步入市味道相當濃烈。此無他，中聯辦講明，5月會進一步開放廣東省21個城市自由行，配合5.1黃金周，對恒豐金而言，簡直遍地黃金。聽聞做收銀位仁兄最慘，皆因自由行之後，恒豐金客似雲來，數錢都數到手軟。以今年春節檔期為例，恒豐金營業額比對上年同期已經翻一番去到7000萬，可以預期，連同5月及10月兩個黃金周，再加暑假、聖誕假及春節，恒豐金可望全面反映自由行因素。
計入自由行進一步開放，以及恒豐金正積極開拓零售網利好因素，PE有望降至7、8倍。憧憬中央提早放料，有消息配合，恒豐金向上挑戰52周高位兼雙底目標1.78元，應無甚難度可言。
寰宇（1046）屬本周另一件，講明係扒冷之選。集團公布最新中期純利438萬，升幅近1倍。展望寰宇全年純利只及1千萬，PE16倍，但對復甦股而言，已經好好睇。
兼且於是次中期內，寰宇中國區溢利更加急漲3.9倍到420萬，表面睇，似乎只區區數百萬，但論爆炸力，中國業務對寰宇全年純利刺激，又可以看高幾線。未計寰宇NAV0.18元大折讓因素，寰宇現價0.103元，已經平過ValuePartners入市價（0.13元），所以，雖云扒冷，但絕對足秤。
錢雋