兒童節快樂！04年兒童節連Twins都會話零舍好玩，事關之後學生哥們放成十幾日復活節假喎。上年兒童節撞正沙士，大人細路都要匿埋屋企不敢出街，今年一定要連本帶利玩個夠。所以今明兩日《飲食人誌》會介紹一些至啱小朋友的餐廳，現在先有兩間玩得又食得的。
記者：李湘虹
攝影：梁翠妍、陳盛臣 模特兒：焯峰、塋珊、凱恩、可欣（StarAsia）
兒童節不一定只是父母送禮物給子女，反而跟他們一起上手工班，會發現大人反而未必及得上小朋友，大家都是一齊學習和成長。
「小朋友好叻喎！」耳邊常聽到手工導師阿怡，稱讚正在埋頭做兔的小朋友。「小朋友要讚多啲，鼓勵多啲，問吓他們想點，只要他們慢慢見到自己親手做成的製成品，就會好有成就感。」
位於太古城的小占美餐室，本來只是主打海鮮和意粉的美式餐廳，星期六、日及公眾假期推出經濟下午茶餐。不過現在趁着兒童節和復活節想吸引一家大細來餐廳，就想出這個親子手工班。每逢周日餐室預留了一個區域讓家長和小朋友學做輕黏土，落堂再歎個下午茶都是$100。本身教授智障人士手工的阿怡，指輕黏土比紙黏土容易控制，效果也較好。「做完這個動物系列之後，視乎反應可能會再有環保手工等。」
這個剛推出的二人套餐，包括頭盤蒜茸包、田園沙律、是日餐湯，意大利粉可選扁意粉、天使幼麫、意大利粉、長通粉、闊條麫，再配香辣蒜茸汁、鮮茄香草汁或芝士白汁。另又有白酒煮蜆、鮮茄燴牛腩、脆炸魚柳、清炒時菜和咖啡或茶。每款份量少少但花樣多多，最啱貪心的大朋友。
想食得貴格，可試試這個集合扒類和海鮮的海陸大會套餐。先有個是日餐湯或頭盤，再選六安士新西蘭牛柳、六安士特級牛骨扒、新西蘭羊扒、秘製醬汁燒豬肋骨、澳洲西冷扒；海鮮則有半隻波士頓龍蝦、虎蝦、珍寶帶子、三文魚扒可選，配紅酒汁、黑椒汁等。最後還有咖啡或茶。
下午茶餐分三類，餐連咖啡或茶：A餐以多士和糕餅為主，B餐是沙律，C餐是粉麵。A餐最方便小朋友，拎住食就得。除蟹子吞拿魚多士外，還有法式煙三文魚三文治和各款切餅。
B餐有三款沙律選擇，小朋友至鍾意香口食物，這個吉列豬排沙律，或者香辣炸雞翼配沙律都一定無走雞。健康點可選擇凱撒沙律，又或者加$15轉小占美夏日特飲夠晒爽。
小占美餐室
手工班時間：逢周日3:30pm-4:30pm
手工班費用：$100（包括手工製作、材料費用及下午茶餐，另收加一服務費）
報名備註：須提早3天前報名，額滿即止。
地址：太古城金星閣G1019號舖（太古城郵政局旁、UNY玩具部出口斜對面）
電話：25138886
營業時間：11:30am-3:00pm，6:00pm-10:30pm（星期一至五）；11:30am-10:30pm（星期六、日及公眾假期）
座位：90個
如果覺得手工班太靜態，位於尖沙嘴的小熊國一定啱你。據負責人講，上年兒童節雖然有沙士，但人龍依然排出外面，每日更有不少3至7歲的小朋友，典晒地大哭大鬧不肯走。他們指最大幫助來自海旁，難怪他們集團會出錢修建這條由彌敦道通往海旁的隧道。不過單是7萬呎的室內主題公園，想來小朋友每年都會來這裏朝聖。
這個兒童餐套餐包括入場費、兒童餐、禮品（遊戲棋或鎖匙扣）和5個遊戲代幣，雖然兒童餐只是啫喱、薯條、香腸意粉或芒果布甸、薯條、炸雞，但諗下本來單是平日入場費已需$30，現在還有得食有得拎有得玩，簡直超抵。不過只做12歲以下小童，優惠期由4月1日至18日。
剛才的套餐只有兒童受惠，這個就不限年齡，可以二人$188，包括入場費、精品店現金優惠券$20、遊戲代幣20個，以及雜扒餐、芒果布甸、DIY刨冰各兩份，雖然似乎不及前面的抵，但勝在有其他優惠券和代幣，不過記得孖住上，如果真是單丁惟有試搵吓其他人夾。優惠期由即日至4月18日。
小熊國（21302130）
地址：尖沙嘴梳士巴利道12號亞瑪遜P2（尖沙嘴地鐵站E出口、新世界中心旁）
營業時間：10:00am-10:00pm（星期日至四）；10:00am-10:30pm（星期五、六及公眾假期前夕）
餐廳座位：330個 備註：4月憑有效學生證可免費入場參觀（只限18歲以下）
