恒指進帳55點，升幅唔算大，但氣氛幾好，每有1隻股票下跌，就有兩隻股票上升。清明假後，復活節前，估計大市會再升一級。
唔炒個別股份，可以炒恒指Call輪，即係炒大市。太近期嘅Call輪，若然重有三幾個巴仙溢價，最好避開。
恒指Call輪最佳對象係9788同9470。9788今年9月到期，輪價20.1仙，溢價3.4%，槓桿率11倍。9470壽命短啲，7月夠鐘，輪價14仙，溢價3.1%，槓桿率17.3倍。
若然睇個市會回番落去，買大市跌，揀恒指Put輪埋手，對象有9437同9213。9437喺6月到期，輪價19.8仙，溢價4.1%，槓桿率12.9倍。9213壽命更短，下月尾夠鐘，輪價10.7仙，溢價3.7%，槓桿率23.8倍。揸Put輪有少少着數地方，就係有批大藍籌4、5月間除息，拉低指數少少，所以遠期期指有負溢價或者低水。不利之處則係大市所處水平已低，估計未來升多過跌。暫時最好咪搞恒指Put輪。若然認為大市都係偏軟，則不妨等個市軟番之後，喺低位買恒指Call輪。
國企有勢，國企指數升幅大過恒指升幅。揀中企Call輪，數據比較靚嘅係9363，6月夠鐘，輪價35.5仙，負溢價0.9%，槓桿率6倍。有好幾隻中企Call輪槓桿率大好多，但要畀十幾個巴仙溢價，則似乎唔值得。
章盛