雖然話無乜焦點新盤開賣，但發展商宣傳推廣冇停過。好似長實長沙灣宇晴軒第二期，最快月中至開放示範單位，但已經諗好多項推廣計劃。
長實高級營業經理郭子威話，分三個階段賣，每階段宣傳費一千至千五萬。假如用平均四千蚊呎價計，成個盤市值三十五至四十億，宣傳費僅逾一巴仙。但比起第一期多一倍。
郭子威重話，今次會較針對港島客，所以準備成百萬份宣傳單張，放喺港島大型百貨公司、同埋郵寄畀港島住戶。到時重會安排多條睇樓穿梭巴士線，往來港島屋苑同售樓處，擴闊客路。
繼中原早排為呢個盤搞誓師後，噚日輪到美聯。董事羅國安話，會喺尖沙嘴港景峰商場內，開設千八呎分行作龍頭舖，並會增添三隊銷售隊伍至二百人促銷。